Lautém, 31/05/2024 (LABEH) – komunidade grupu feto potensial sira iha suku Lore 1, postu Administrativu Loré, Munisipiu Lautem kria grupu ida ho naran Feto Potensiál Agrikultor (GFPA) hodi kuda batar, maibe bainhira akontese mudansa klimátika fo impaktu ba tanba ular lakataru estraga hotu batar ne’ebe sira kuda.
Reprezentante grupu feto potensial agrikultor, Zelia Fernandes hateten, sira nia grupu ne’e hahú moris iha tinan 2012, kompostu husi feto nain 13, ho hahú kuda batar hamutuk iha tos hektares hat (4) rezultadu ne’ebe mak diak, tanba bele koileta to’o bidon 10 ba leten.
“Ami nia grupu hahú moris iha 2012, no ami nain 13 mak hamutuk hahú kuda batar iha tos hektares (4) haat, ne’ebe kuda batar nia rejultadu diak los, no batar ne’e ami koileta to’o bidon 10 ba leten, tanba udan mai tuir nia tempo, ne’ebe ami mos sente kontente tanba ami nia kolen nia rejultadu neebe diak tebes mai ami.” Dehan Komunidade Jelia Fernandes ba jornalista sira iha nia kna’ar fatin Postu Lore Munisípiu Lautém, 31/05/2024
Nia dehan, rezuladu husi koileta batar ne’e, sira hodi konsumu , fo han manu, no bainhira ema hakarak sosa sira faan ba ema. No rezultadu faan batar hodi hare oan sira nia eskola no mos uza ba sira nia nesesidade bázika nian.
“Ami sempre kuda batar kada tinan tuir udan nia tempo mai 2022 até 2023 batar ami kuda nia rejultadu ladiak, tanba kauza hosi mudansa klimátika udan monu rai la tuir nia tempo ona, tanba kada tinan ami nia udan monu rai iha fulan novembru nia laran, maibe udan mai iha fulan marsu no maio ami sente udan la tuir ona nia tempo ho nunee batar nia rejultadu ladiak ona hanesan tinan kotuk sira liu ba”. Nia esplika
Enkuantu Tinan 2024 udan monu rai tuir nia tempo ho nune’e sira hahu kuda batar ona, maibe nuu fim iha fulan dezemvru udan hahu para ona, entaun hanesan tos nain sente triste tanba udan la mai, no sira mos lahatene nia kauza nee mai husi saida, mai to’o iha fulan marsu mak foin udan fali entaun batar balun mate, no balun neebe moris konsege fo isin, maibe nia rejultadu ituan deit, entaun lahanèsan tinan sira seluk, i sira sente triste tebes, maibe situasun mak hanesan nee ona sira labele halo buat ida.
“Iha tinan 2024 ami kuda batar, maibe ular lakataru mai estraga deit, tanba udan la mai kompara ho tinan uluk sira seluk wainhira udan mai tuir nia tempo ular lakataro mos mate, maibe wainhira udan para fulan ida hanesan ular lakataro hahu moris no estraga ami nia batar tahan too mate no nia rejultadu laiha liu”. Nia akresenta
Ular lakatoro estraga batar, sira sente triste tebes tanba sira nia kolen laiha rejultadu neebe sira hakarak , husu apoiu husi lideransa komuniatria no Organizasaun Non Governamental (ONG) FAO mai hare ho matan, maibe to’o agora seidauk lori aimoruk ruma hodi mai rega ou hamate ular lakataru sira nee to sira nia batar mate hotu.
“Ami kompara tinan sira seluk nia rejultadu diak maibe tinan ida ne’e ami sente triste tebes tanba udan mos la mai tuir nia tempo no ular lakataro mos mai estraga ami nia batar to ikus rejultadu laiha los”. Ho halerik nia konta
Iha sorin seluk lideransaária Sucu Lore 1, Abilio Amaral, afirma, maske komunidade agrikultor atu hasae ninia produsaun as iha tempu mudansa klimátika, maibe ular lakataru mak estraga total, tanba udan mai la tuir nia tempo no bainhira udan mai tuir nia tempo mak ular lakataro mate hotu, maibe udan mai tiha para fila-fali to fulan ida ka rua mak mai fali lakataro han hotu komunidade sira nia batar.
“Ita hato’o ona ba ministeriu agrikultura hodi husu apoiu kona-ba aimoruk lakataro ninin, maibe realidade iha ministeriu la prepara aimoruk sira ne’e, ne’ebe iha tinan kotuk husi NGO FAO Mai halo promosaun, liu-liu atu halo aimoruk hodi hamate ular lakataro husi produtu lokak sira hanesan tobu hodi rega ba lakataro sira ne’ebe fo afeita ba iha ita nia komunidade nia batar sira, maibe materiál sira ne’e mak ita buka susar tebes. Ne’ebe sira para produsaun aimoruk uja produtu lokál ate agora”. Dehan nia
Enkuantu postu-administrativu Lore hanesan administrativu foun iha munisipiu Lautem, ho totál populasaun hamutuk 3.723 kompostu husi mane 1865, feto 1863, no area totál 133,77 km2.
Enkuantu informasaun ne’e jornalista sira hetan liu husi atividade media tour ne’ebe realiza husi Asosiasaun Jornalista Timor Lorosaˈe (AJTL) servisu hamutuk ho Oxfam iha Timor-Leste, no hetan fundus husi Oxfam Hongkong.
Reportajen : Adão da Costa
