Díli, 06/06/2024 (LABEH ) – Organizasaun Timor-Leste Press Union (TLPU) entrega ona karta insatisfasaun ba gabinete ZEEMS RAEOA nian iha Díli hodi husu klarifikasaun ba Prezidente Autoridade RAEOA ligadu ho aktu ne’ebe protokolu nian komete hodi halo impedimentu ba servisu jornalista nian, hodi halo agresaun fiziku hasoru jornalista destakadu husi Agensia Nasional Tatoli.IP nian iha RAEOA ho naran Abilio Ello, bainhira hala’o hela kobertura ba asuntu asina akordu entre RAEOA ho Timor Aid iha hotel Ambeno RAEOA.
Sekretáriu Jerál, Timor-leste Press Union (TLPU) ,Sejitu Da Silva , ba jornalista sira heteten, hanesan organizasaun jornalista ne’ebe ho misaun sagradu fo advokásia ba liberdade imprensa no liberdade espresaun hodi hametin demokrasia, neˈebe previstu ona iha konstituisaun RDTL artigu 40 no 41, koalia kona-ba promove direitu sira ba liberdade imprensa no direitu ba asesu informasaun.
“TLPU nu’udar organizasaun ne’ebe fo mahon ba jornalista Timor oan tomak ho objetivu atu promove no defende direitu jornalista sira nian bainhira hala’o knaar professional iha orgaun komunikasaun social” dehan sekjen TLPU sejitu da silva ba jornalista sira iha Timor lodge hafoin submete karta kontestasaun ba gabinete ZEEMS RAEOA nian iha Díli quinta 06/06/2024
Nia haktuir tan mos iha Lei komunikasaun sosiál artigu ualu (8) ne’ebe sita katak liberdade imprensa direitu jornalista sira nian hodi fo hatene ka ejerse tuir prerogativu konstituisionál, labele sai nu’udar objeitu influensia, independensia , tanba iha direitu hodi buka no hetan informasaun ne’ebe ba interese publiku.
“Iha Artigu 19 iha lei komunikasaun sosiál mos sita kona-ba garante jornalista sira nia direitu hodi hetan dalan ba fontes ofisiál informasaun liu husi eventu hotu ne’ebe nakloke ba ema tomak no nakloke ba orgaun komunikasaun sosiál tomak hodi rekolla informasaun importante sira ba publiku,” nia salienta
Nune’e klaru mos iha lei komunikasaun artigu 41 nian kona- ba atentadu ba liberdade informasaun iha alinea 2 ema sivíl ka funsionáriu publiku ka ajente estadu ne’ebe impede servisu jornalista ka komete atentadu ba liberdade imprensa sei hetan kastigu ho pena prizaun to’o máximu tinan tolu ka multa.
Bazeia ba konstituisaun RDTL artgu 40 n0 41 no mos lei komunikasaun sosíal artigu 8 no 41 ne’e mak TLPU lamenta no kondena atetudi neebe komete husi pesoál protokolu Prezidente Autoridade Reziaun Administrativu Espesiál Oe-kusse Ambeno Raeoa Rogerio Tiago Lobato ho naran Aquito Roxaca Guterres ne’ebe rasta monu no tenta atu tuku tan Jornalista Agensia Notisioza Timor-Leste institu publiku Tatoli-IP, Abilio Ello, bainhira hala’o hela atividade jornalizmu iha hotel Ambeno.
Kazu ne’e akontese iha hotel Ambeno iha loron tersa tuku 17:00 loraik iha ambitu serimonia asina akordu entre autoridade RAEOA, Rogerio Tiago Lobato ho Timor Aid atu estabelese muzeu tais Timor iha Oe-kusse Ambeno.
Entertantu Relasiona kazu ne’e Timor-Leste Press Union (TLPU) konsidera asaun ne’e krime tanba impede servisu jornalista sira nian no mos tentativa ida ne’ebe fo ameasa ba liberdade imprensa no liberdade espresaun ne’ebe garante ona iha konstituisaun Republika Demokrátika Timor-Leste iha artigu 40 no 41.
Nune’e TLPU mos husu ba Prezidente Autoridade Administrativa RAEOA halo demisaun ba funsionáriu ka protokolu referidu, tanba la respeita lei hirak ne’ebe vigora iha Timor-Leste.
Reportajem: Abrão da costa, Honorio guterres
