Friday, July 19, 2024
HomeNEWSMJDAK Husu ba  Sosiedade Hotu Atu Halo Atividade Desportu Lor-Loron

MJDAK Husu ba  Sosiedade Hotu Atu Halo Atividade Desportu Lor-Loron

Díli, 27/06/2024 LABEH – Ministériu Juventude Desportu Arte no Kultura (MJDAK), realiza semináriu nasionál ba juventude sira, ho tema “Importánsia Atividades Desportiva Ba Ita-Nia Saúde”, Hodi motiva sosiedade hotu hotu atu hala’o atividade desportu lor-loron tanba importante tebes ba saúde, Atividade ne’e realiza iha salaun Esperansa Aimutin Dili.

Diretór Jerál Ministériu Juventude Desportu Arte no Kultura João Rodrigues katak, presiza sosializa no motiva juventude sira inklui inan-aman atu labele hein de’it atividade ne’ebé determinadu ona, maibé presiza halo atividade lor-loron tanba di’ak ba saúde.

“ ita presiza sosializa no motiva juventude no inan-aman sira atu labele hein de’it atividade sira hanesan 20 de Maio ka 30 de Agusto maka foin ita halo desportu, maibé ita presiza halo atividade desportu lor-loron tanba ita-nia isin presiza ezersísiu atu nune’e bele di’ak ba ita-nia saúde. Ezemplu ezersisiu báziku ka baratu liu maka la’o ain lor-loron  mínimu ita tenki la’o rihun 5 pasus ka rihun 10 pasus,nune’e bele fó saúde ba ita-nia isin, tan ne’e MJDAK halo sosializasaun ne’e la’ós ba deit juventude sira maibé ba inan-aman sira hotu atu labele dependénsia de’it ba aimoruk”. Dehan Diretór Jerál Ministériu Juventude Desportu Arte no Kultura, 27/06/2024.

Iha sorin seluk juventude Feliciano de Oliveira agradese tanba bele partisipa iha semináriu ne’e, nune’e hanesan juventude tenki aproveita oportunidade hodi aprende barak liu-liu iha área desportu nian.

“ hau agradese tanba bele hetan oportunidade hodi mai partisipa iha semináriu ne’e, tanba nu’udar joven tenki aproveita hodi aprende barak, liu-liu iha desportu nian. Aleinde iha desportu ne’e la’os hanoin deit atu ba joga bola, maibe iha atividade desportu barak ne’ebé ita presiza halo depende ita nia abilidade, no ita nia hakarak. No hanesan joven ita mos presiza bolu malu hodi aprende hamutuk ba iha atividade desportu hotu tanba dalabarak ema sempre dehan ita maka autór ba konflitu.” Feliciano agradese.

Enkuantu atividade semináriu ida ne’e partisipa husi juventude sira husi Posto Administrativu Dom Aleixo Munisipiu Dili ne’ebé delegadu husi suku 7 hamutuk ema nain 50, Administradór Postu Administrativu Dom Aleixo, inklui Komisaun Organizadora no Autoridade Lokál sira.

Reportajen : Meliana Dos Santos Manuela Moniz

RELATED ARTICLES

Most Popular

Recent Comments