Dili, Timor-Leste – Eventu Walk the Talk ne’ebé organiza husi OMS Timor-Leste molok Loron Mundiál ba Hepatitis iha loron 28 fulan Jullu hetan partisipasaun signifikativu husi komunidade. Marsa ne’ebé hahú iha banku raan Ospitál HNGV nian – sentru vital ida ba triajen no diagnóstiku hepatite nian – hetan partisipasaun husi Prezidente J Ramos-Horta iha Ponte Habibie.
Kada 30 segundu ema balu lakon moris tanba hepatitis B ka C. Iha Timor-Leste, funu hasoru hepatite, HIV, no infesaun sira ne’ebé hada’et liuhosi relasaun seksuál maka dezafiu urjente ida ba saúde públika. Hepatite B maka partikularmente prevalente, ho taxa infesaun aas to’o 7% entre ema sira ne’ebé moris ho HIV no to’o 6% iha populasaun jerál, pesoál saúde sira, no feto isin-rua sira. Enkuantu ladún komún tanba teste limitadu, hepatite C sai nafatin preokupasaun ida ho prevalénsia 0.6%. Maski ho dezafiu sira-ne’e, iha razaun ba ita atu optimizmu.
Prezidente Horta hatudu ninia apoiu ba inisiativa ne’e, hodi haktuir katak, “Ha’u kontente bele partisipa iha eventu ohin nian. Ha’u aprende buat barak kona-ba hepatite no, hafoin rona númeru sira husi OMS, ha’u husu ba sira atu kontinua inisiativa ‘Walk The Talk’ ne’e ba promove saúde.”
Reprezentante OMS Dr. Arvind Mathur sublina progresu ne’ebé maka halo hosi OMS no Ministériu Saúde, inklui teste ne’ebé habelar, vasinasaun, no tratamentu ba populasaun vulneravel sira, no mós introdusaun ba matadalan foun sira kona-ba hepatite B no C. Maibé, nia subliña nesesidade atu aumenta taxa teste no tratamentu, hamutuk ho vijilánsia ne’ebé aumenta.
Hodi repete urjénsia situasaun nian, Dr. Mathur subliña tema tinan ida-ne’e nian, “Tempu to’o ona ba asaun!” Nia subliña papél krítiku aten nian iha isin no husu esforsu koletivu hodi kria Timor-Leste livre hosi hepatite.
