Díli,20/08/2024 (LABEH) – Organizasaun naun-governamental Forum Komunikasaun Feto Timor-Leste (FOKUPERS), ida neʼebé servisu iha area Direitus Umanus liu-liu ba Direitu Feto no Labarik Feto ne’ebé sai vítima hósi Violénsia Bazeia ba Jéneru (VBJ).
Liu husi konferensia inprensa porta voz Natalia de Jesus ba jornalista,hateten,fokupers kordena makaas asaun violasaun hasoru feto,tanba daudaun violensia kontinua akontese iha Timor-Leste
” Fokupers mai ho nia vizaun Feto Timor-Leste Moris iha Dame iha Uma Laran, Komunidade no Nasaun nee respeita igualidade jéneru no ho Misaun Hapara Violénsia hahu hósi nivel individu, uma laran to’o nivel instituisional nian liu hósi movimentu hodi hakhi’it feto iha aspektu hotu-hotu ho servisu integradu”, dehan porta voz Natalia de Jesus liu husi komferensia imprensa iha salaun Marfin 20/08/2024
FOKUPERS mós iha papel importante ida iha sosiedade hódi hare’e kona-ba problema Violénsia Doméstika, Violénsia Bazeia ba Jéneru (VBJ) ne’ebé akontese iha Timor-Leste no oinsa mák bele halo prevensaun iha nivel komunidade, familia no sosiedade, liu-liu atu asegura feto no labarik feto livre hósi diskriminasaun, Asédiu Seksual, Violasaun, Torturasaun, Lakon liberdade no vida tambá violénsia.
Porta voz ne’e salienta katak,Iha tinan hirak ikus ne’e, Fokupers no ita hotu akompaña iha media sosiál hanésan Jornál, Televizaun, Facebook no seluk tan, notisia sira hatudu katak feto no labarik feto barak mák sai vítima hanésan hósi aktu Asédiu Seksual, Violénsia Fiziku, Violénsia Psikolójiko, Violénsia Ekonómika no Omesidiu agravadu no más violénsia sira selúk.
“Husu ba Ministeriu Xáve sira nu’udar implementadór Lei Kontra Violénsia Doméstika no Planu Asaun Nasional Violénsia Bazeia ba Jéneru atu tau iha Planu Asaun Anuál tinan 2025 nia ba oin iha alokasaun Orsamentu Jeral do Estadu ba dezenpeña sira ma funsaun iha prevensaun no responde ba Violénsia Bazeia ba Jéneru”, porta voz nee tenik.
FOKUPERS husu Provedór Direitus Humanos no Justiça (PDHJ) atu asegura implementasaun Lei liu bósi monitorizasaun ba lei sira Manuais, Regulamentu sira nia implemtasaun ho efikas tuir prinsipiu DII no Boa Governasaun, Ba organizasaun sosiedade sivil hotu atu haforsa rede advokasia iha prevensaun.
“Husu ba Komunidade sira hotu atu hakribi no hapara Violénsia oi-oin hasoru feto no labarik feto atu halo medidas de prevensaun antes akontese no responde imediata ba violénsia doméstika bainhira akontese, tamba Violénsia Doméstika konsidera nu’udar Krime Públiku,Se deit mak haré no rona Violénsia Doméstika akontese iha uma ka iha fatin públiku sira hatoo kedas keixa ba polisia atu tulun vitima”,Hakotu.
Reportajen: Anito da Silva & Jullio Paixão.
