Ainaro, 16/10/2024 (MEDIA LABEH) – Grupu negósiu Nasionál hamutuk 87 hosi Munisípiu 13 promove produto agrikola lokál ne’ebé ho kuáliade iha feira Festival Kulturál Rabilau.
“Maibé ita iha problema uitoan mak espasu tanba dahuluk ita planu prepara baraka 50 maibé realidade to’o horiseik grupu aumenta to’o 72 no hosi Same ne’ebé iha dalan ona hamutuk 15, entaun hamutuk 87”, dehan Vise-Ministru Komérsiu no Indústria (MCI), Agusto Junior Trindade ba jornalista LABEH , iha Festival Kulturál Rabilau,16/10/24
Tanba ne’e ekipa MCI buka espasu nune’e grupu 15 bele tau sira-nia produtu lokal sira. Hosi ne’e bele harame liután feira no Festival Kulturál Rabilau ne’e.
“Ami buka hela espasu atu sira to’o mai bele tau sira-nia produtu. Agora ami rejista hela no buka hela meza kadeira nune’e bele tau produtu. Ita haree komunidade hosi Munisípiu sira ne’e mai halo rame feira no Festival Kulturál Rabilau ne’e. Ita-boot sirs haree komunidade la’o ain mak barak no antuziazmu tebes-tebes hodi partisipa, ida-ne’e hatudu antuziazmu ne’e boot”, nia dehan.
Vise-Ministru Komérsiu Indústria salienta iha feira ne’e MCI prioridade ba Munisípiu Aileu, Ainaro, mo Manufahi hodi halo promosaun ba agrikola, kafé, lakeru, batar, no seluk tan.
“Prioridade liu ita fó Munisípiu tolu mak Manufahi, Ainaro no Aileu maibé ami la taka dalan ba Munisípiu seluk atu voluntáriamente, porezemplu ita-nia inan-aman hosi Munisípiu Viqueque, ho Lospalos, sira mai ho sira-nia rain, homan. Produtu ne’ebé lori mai ne’e produtu agrikola ita-nia rasik. No iha mós Indústria Tua Kuda Ulun, no iha chokolate no maiória iha feira ne’e produtu agrikola. Iha ne’e mós feira sorgum ne’ebé halo ba sasoro, lakeru diversifika ba bolu, no iha mós gastronomi. Alende ne’e batar ho kafé ne’ebé fai de’it la’ós uza mákina no iha laran ita bandu mie instan iha feira ne’e”, nia salienta.
Xefe Grupu Kafé Família, hosi Munisípiu Manufahi, Natalia da Costa Noronha, dehan grupu Kafé Família ne’e mai halo promosaun ba produtu kafé no produtu selukn, kestaun sosa ne’e la sosa ne’e la’ós sai problema maibé importante mak promove nune’e ema bele hatene.
“Ohin ha’u lori kafé ho modelu rua mak kafé arabika ho kafé lakuten ne’ebé ami lori mai iha feira ne’e. No iha produtu kamí, kaijus, maek, no nuu-maran. Ami mai ne’e halo promosaun, ema la sosa laiha problema, ita hakarak no presiza promove nune’e ema hatene ita-nia produtu sira. Produtu hirak-ne’e ho nia presu ne’ebé la hanesan hosi $1.50, $2.50 no $5”, nia dehan.
Ligadu ho dalan, nia dehan maske dook maibé nafatin kontente tanba bele promove produtu atu nune’e labele depende de’it ba produtu hosi rai li’ur. Presiza promove produtu tanba se lae, hatun ema la hatene produtu Manufahi nian. Tanba dala barak ema hanoin kafé ne’e hosi Munisípiu Ermera nian de’it. Maibé ita Manufahi mós iha produtu kafé
“Feira ne’e di’ak tanba grupu produtu sira bele promove maibé problema mak dalan ka estrada tanba horiseik tuir mai susar uituan. Tanba ne’e oportunidade ne’e hakarak rekomenda governu liuliu MCI ne’ebé organiza feira ne’e presiza tau atensaun ba dalan”, nia hakotu.
Reportagen : Anibal do Espirito santo
