Ermera, 20/11/2024 (LABEH) – Relasiona ho akontesimentu mudansa Klimatika iha Timor-Leste, Komunidade Keubasa postu Letefoho Marcos Da Silva preukupa no halerik, tanba mudansa klimatika fo impaktu ou estraga hotu sira nia produtu ai-han ne’ebe mak sira kuda iha to’os laran
Tanba ne’e nia dehan, Udan agora mai tarde, entaun kuda batar mós tarde, nune’e tinan ida ne’e udan mai la tuir nia tempu hodi fo impaktu negativu ba produtu ai-han ne’ebe mak iha to’os laran.
“Udan agora tarde Nune’e kuda batar mos tarde, ne’ebé udan la iha buat hotu-hotu la iha, no udan iha entaun talas no fehuk sira mos iha, ita bele dehan baut hotu iha, maibé udan tarde buat hotu la iha isin”. Dehan Komunidade Marcos da Silva ba jornalista iha nia fatin Keubasa postu Letefoho Kuarta, 20/11/2024
Marcos hatutan, Tinan kotuk udan mai tuir nia tempu, entaun fehuk, talas, koto no produtu seluk tan Moris Diak hotu, maibé tinan ida ne’e produtu ladun diak, tamba udan mai la tuir tempu entaun estraga hotu produtu sira ne’ebé mak komunidade sira iha.
“Lori ami nia produtu asesu ba iha merkadu ho distansia ne’ebé dok tebes,tanba ne’e ami la’o kuaze oras rua mak foin to’o merkadu Lauana hodi faan ami nia produtu hirak ne’e”. Nia esplika
Enkuantu produtu ne’ebé mak babain Marcos lori ba faan iha merkadu mak koto, tanba koto folin di’ak liu kompara ho produtu sira seluk. Nune’e koto ne’ebé mak nia lori ba faan iha merkadu ne’e, ba faan dala ida bele hetan too $40, no tun liu mak $25.
Entretantu produtu hirak ne’ebé mak sira ba faan leba de’it, la’o ain husi hela fatin ba to’o merkadu Lauana.
Reportajem: Manuela Moniz
