Sunday, April 14, 2024
HomeNEWSUE Apoiu $662 Mil Ba Dezastre Naturais Ne’ebe Akontese Iha Timor-Leste

UE Apoiu $662 Mil Ba Dezastre Naturais Ne’ebe Akontese Iha Timor-Leste

Díli, 29/02/2024 (LABEH) – lansamentu ba projetu hodi hasa’e rezilensia komunidade nian ba dezastre ne’ebé mak akontese iha rai laran, nune’e  governu liu husi Ministériu Interior (MI) no Sekretária Estadu Protesaun Sivil (SEPS) no mós Autoridade Nasional Protesaun Sivil (APC) hetan apoiu fundus husi Uniaun Europa liu husi komunidade Pasífiku ho montante orsamentu hamutuk $662 mil.

Sekretáriu Estadu Protesaun Sivil, ,Mariano Domingos Reis, hateten ho orsamentu hirak ne’ebé mak UE Apoiu ne’e sei aloka ba iha projetu hanesan Mitigasaun, Prevensaun, no Redusaun risku dezastre iha Timor-Leste ne’ebé mak ho indikador rua hanesan, ida mak komunidade hahu husi aldeia to’o Munisípiu sira, no indikador segundu mak ba eskola sira, hahu husi eskola primaria to’o sekundaria.

“Ita nia esperansa mak, projetu ida ne’e bele kontribui ba redusaun risku dezastre, no ita bele hateten katak, bele elemina risku dezastre iha Timor-Leste hodi Promove poupansa ba orsamentu jerál estadu (OJE)”. Dehan Sekretáriu SEPS Mariano Domingos Reis ba jornalisata hafoin halo lansamentu iha salaun APC, Kinta ne’e

Nia dehan, kontribuisaun sidadaun hotu ne’e importante, tanba, ida ne’e sai hanesan save importante hodi bele lori susesu ba Timor-Leste ida ne’ebé seguru husi dezastre.

Iha fatin hanesan Reprezentante Uniaun Europeia iha Timor- Leste, Vise-Xefe Misaun, Christoph Sorg mos fahe nia hanoin kona-ba inisiativa husi projetu, hanoin sira ne’e refleta husi dezafiu ne’ebé Timor-Leste hasoru durante siklon tropikal Seroja iha tinan 2021 no fó ênfaze ba projetu ne’e nia papél atu hametin reziliensia iha rejiaun Pasífiku.

“Projetu BSRP Il reprezenta ita-nia esperansa koletiva no reziliensia, ho objetivu atu hametin ita-nia preparasaun no resposta ba dezastre sira”. hateten Vise-Xefe Misaun

Reprezentante UE ne’e akresenta, rejiaun Pasífiku sei kontinua hasoru ameasa barak liu-tan husi dezastre naturál no mudansa klimátika, entaun lansamentu projetu BSRP Il marka ona hakat ida-ne’ebé signifikativu no esforsu koletivu atu proteje no hasa’e reziliensia komunidade sira-nian.

Liu husi parseria no kolaborasaun, Timor- Leste no ninia viziñu sira iha Pasífiku sei haka’as an atu hamenus impaktu dezastre naturais nian no asegura futuru ida-ne’ebé seguru liu ba jerasaun sira tuir mai.

Enkuantu lansamentu projetu ida-ne’e signifikativa no esforsu koletivu atu proteje no hasa’e reziliensia komunidade sira nian Liu husi parseria no kolaborasaun. Ne’ebé  Timor Leste no ninia viziňu sıra iha Pasifiku sei haka’as an hodi bele asegura ita nia sidadaun sira ne’ebé afeta ba dezastre.

Reportajem : Adão da Costa & Eufrasia da costa Ximenes

RELATED ARTICLES

Most Popular

Recent Comments