Díli, 26/03/2024 (LABEH) – Negosiante Terezina Gonsalves husi Munisípiu Ermera, postu administrativu Atsabe, Suku Lasaun, Mai buka moris iha kapitál Dili, hanesan faan sigaru hodi selu oan sira nia eskola no sustenta ba família lor-loron nian
Negosiante faan sigaru ne’e haktuir katak, ho nia aktividades hanesan ema negosiante ne’e, nia faan de’it mak sigaru, no nia faan hahu husi dader to’o kalan, tanba de’it atu sustenta moris lor-loron no selu oan nia eskola.
“Ami nia moris mak, loron to’o kalan faan mak sigaru de’it, i ami tur faan sigaru desde dader to’o fali jam 8 kalan mak foin hotu, i depois kada loron ami hetan de’it lima dólar, barak liu mak $10”. Dehan negosiante Terezina Gonsalves ba jornalista LABEH iha terminal tasi tolu, Tersa 26/03/2024
Nia hatutan, negosiante la’ós faan tutan ema seluk nian maibé nia uza rasik nia osan ho nia modal $50 mak hodi sosa sigaru para faan fila fali iha estrada ninin.
Aleinde ne’e mós nia dehan, ho nia negósiu hanesan faan de’it sigaru ne’e ladún sufisiente ba nia, tanba loron ida bele han dólar ida de’it, tanba loron ida nia hetan rendimentu ne’ebé mak menus tebes.
Nune’e, maske husi parte governu bandu negosiante sira atu faan sasán iha dalan ninin maibé sira nafatin faan, tanba sira moris ho faan sigaru mak foin bele hetan osan hodi selu oan sira nia eskola.
“Ami senti ladún di’ak, tanba ami nia moris mak ida ne’e, ne’ebé bainhira governu bandu ami lakoi faan sasán iha dalan ninin entantu ami senti la di’ak tanba, liu husi faan sigaru ne’e mak ami han loron kalan nian no bele selu osan sira nia eskola”. Ho halerik Nia salienta
Tanba ne’e negosiante ne’e husu ba parte governu la bele bandu ami atu faan iha dalan ninin, se governu bandu entaun governu hanoin netik hodi selu sira nia oan nia eskola.
Reportajen: Marciana Soares & Adãao Da Costa
