Díli,01/03/2024 (LABEH)- Governu Reinu Unidu Tempu badak sei harí nia Embaixada (Británika) iha Timor-Leste hanesan kompromisu ida Ne’ebe klaru tuir Reinu Unidu nian atu hakle’an no hametin liu tan relasaun bilaterál entre rai rua ne’e.
Ministra Reinu Unidu bá Indo-Pasífiku, Anne-Marie Trevelyan, kontente tebes mai vizita Timor-Leste bá dala-rua nian, tanba ba dala-ida ne’e hanesan oportunidade di’ak atu halo kolaborasaun di’ak iha relasaun bilaterál entre Timor-Leste ho Reinu Unidu.
Área sira ne’ebé sei estabelese kooperasaun ho Timor-Leste mak hanesan saúde, edukasaun, nutrisaun no mós dezenvolvimentu iha ekonomia.
“Ha’u kontente tebes hasoru Primeiru-Ministru Kay Rala Xanana Gusmão no kontente mós atu anunsia katak sei loke embaixada foun Británika nian iha Timor, no ida-ne’e demonstra kompromisu boot Governu Reinu Unidu nian mai Timor-Leste,” Ministra Reinu Unidu ba Indo-Pasífiku, Anne-Marie Trevelyan hateten bá jornalista sira hafoin hasoru malu ho PM Xanana iha Palásiu Governu, Sesta (01/03/2024).
Nia hatutan loke embaixada Británika iha Dili sei marka hanesan faze importante ida ba iha relasaun bilaterál nasaun rua nian. Timor-Leste no Reinu Unidu sai nasaun rua ne’ebé belun boot no Reinu Unidu sei kontinua fó apoiu ba prosesu dezenvolvimentu iha Timor-Leste.
Primeiru-Ministru Kay Rala Xanana Gusmão hateten, atu hare ba Indo-Pasífiku ne’e dunik nia mai tiha ona iha Outubru, tinan kotuk, no ohin mai tan dala ida atu relata de’it solidariedade mai Timor-Leste, no atu ko’alia mos kona-bá nia servisu.
Antes ne’e Prezidente Repúblika, José Ramos-Horta halo vizita Estadu bá Reinu Unidu hodi hasoru mós Ministru Relasaun Externa Reinu Unidu nian, ne’ebé iha asuntu balun ne’ebé sira ajuda Timor-Leste nune’e ohin sira ko’alia asuntu barak kona-ba mundu, rejiaun ninian, Pasífiku no Timor-Leste.
Kay Rala Xanana Gusmão agradese tebes ba pais reinu unido tanba bele fo oportunidade ba Timor oan sira Besik Rihun haat resin mak servisu ona iha reinu unido liu husi passaporte porguesa nian maibe governante UK nafatin konsidera sidadaun sira ne’e husi Timor leste.
Reportajem:Abrão da Costa
