Díli, 05/03/2024 (LABEH)- Komisaun Reguladora Artemarsiais (KRAM) simu informasaun no detekta katak, Membru organizasaun tolu hanesan, persaudaraan setiah Hati Terate (PSHT), Kmanek Oan rai klaran (KORK), no ikatan kera Sakti putra Timor-Leste (IKS-PTL) kontinua treinu subar no kontinua komete iregularidade hodi la kumpri rezolusaun No.45/2023 kona-ba suspensaun atividade treinamentu sira.
Prezidente KRAM Octávio da Conceição haktuir, iha lei No.45/2023 ne’e katak, provizoriu sei suspende atividade treinamentu arte Marsiais sira nian, maibé, membru arte Marsiais sira la kumpri rezolusaun ne’ebé mak konsellu Ministru (KM) aprova ona.
“KRAM detekta, simu informasaun hotu-hotu husi sub-estrutura sub-KRAM Munisípiu sira katak, organizasaun PSHT nia membru sira kontinua halo atividade treinamentu subar-saubar, kontinua hatais farda la’o ba mai iha bairo laran sira, no kontinua halo publikasaun iha media sosial sira, provokasaun entre artemarsiais”. Dehan Prezidente KRAM Octávio da Conceição ba jornalista liu husi Kominikadu imprensa iha salaun KRAM, tersa-feira, loron 5/03/2024
Aleinde ne’e mós KRAM simu informasaun no detekta katak, membru organizasaun IKS-PTL sei iha nafatin, treinador sira fó treinu subar-saubar, husi fatin ida ba fatin ida, i dalaruma mós konvida malu tama iha Hotel Laran, hodi hanorin malu iha ne’eba.
Tanba ne’e ho respeitu, KRAM husu ba lideransa estrutura nasional PSHT, KORK, no IKS-PTL atu respeita ordem estadu nian liu husi rezolusaun No.45/2023.
Enkuantu atu obedese mós ba regulamentu no lei hotu-hotu, Liu-liu lei No.5/2017 artigu 32 ko’alia kona-ba kolaborasaun husi lideransa no treinador sira. Nune’e husu mós atu sira bele kumpri rezolusaun, ne’ebé kuandu sira sei la kumpri nafatin mak tuir lei No.5/2017 artigu 9 hateten katak, KRAM iha kompetensia atu hato’o pareser legal, no Favoravel sira, para Ministru MJDAK hodi aprezenta ba iha konsellu Ministru (KM) hodi foti desizaun sira tuir mai.
“Ida ne’e hateten katak, rezolusaun No.45/2023 ne’e sei remata iha sia 10 Abríl tinan ida ne’e, maibé, kuandu membru no treinador ka lideransa sira la kontrola nia membru sira, ne’ebé kontinua komete atividade iresita sira mak KRAM dehan katak, falta Des-obedensia, falta kolaborasaun, disiplina, no falta des-oredem ba Orden estadu nian”. Nia dehan
Aleinde ne’e mós nia dehan, iha tempu badak KRAM sei notifika lideransa artemarsiais tolu ne’e atu kontrola sira nia aktividades no membru nia atitude sira, para nune’e bele fo biban no fo razaun ba KRAM hodi aprezenta rekomendasaun sira ba pareser favoravel Ministru MJDAK hodi aprezenta ba KM iha loron 10 Abril tinan ne’e.
Reportajem: Adão da Costa & Honório
