Díli,16/03/2024(LABEH)-Ministériu Juventude Desportu Arte Kultura, sigla portuges (MJDAC) hahú hala’o sosializasaun anti-doping ba jogador juveníl sira totál nain lima nulu (50), hodi intende diak liu kona-ba saida mak anti-doping.
Tanba ne’e liu Husi atividade ne’e hanesan partilla informasaun ligado ho anti-doping nunee sai mos hanesan advokasia obrigatóriu ida husi parte governo nian halao ba modalidades hotu-hotu liu-liu ba atleta sira iha Timor-Leste.
“Atividade ita fahe informasaun kona ba anti-doping ida ne’e hola parte husi advokasia, obrigasaun governu tenke halo ba modalidade desportu hotu,tanba obrigasaun ba ita nia atleta sira iha Timor-Leste, nune’e sira iha informasaun kona ba anti-doping ba aban bainrua nian, MJDAC hahú fahe informasaun anti-doping atu nune’e fo kuñesimentu diak liu tan ba federasaun sira hotu hahú ho labarik sira tanba husi kiik sira kunese anti-doping sira bele dixiplina liu tan hodi sai atleta profesionál”, dehan ministru juventude desportu arte kultura Nelyo Isaac Sarmento ba jornalista sira iha Xanana Sport Center Bairro Formosa, Dili sabadu (16/03/2024).
Governante ne’e fundamenta, daudaun ne’e governu liu husi MJDAC iha ona konsentrasaun ida atu kria komisaun anti-doping iha Timor-Leste maske dadaun ne’e Timor-Leste iha hela kondisaun dezenvolvimentu nia laran, maibe apoiu liu husi parseiru UNESCO ho apoiu tekniku husi komisaun anti-doping internasionál ho Azia nian preparadu inisia tinan ida ne’e posibilidade kria komisaun anti-doping iha Timor-Leste.
Tuir MJDAC nee katak, daudaun ne’e Timor-Leste nu’udar pais ida nebe inklina an iha Azia no território país iha mundu liu-liu regra sira Nebe sai nu’udar prosedimentu hala’o iha desportu nune’e Timoroan liuliu hahu husi formador ou treinador, ekipa tekniku, mediku fiziku ho hahan ninian no atleta sira iha kunesimentu luan ba anti-doping atleta ida labele detekta uza doping tanba bainhira atleta uza doping nia tenki sofre prestasaun hetan iha nivel nasional ho internasional la vale no futuru atleta la iha ona prestasaun nebe di’ak.
“Mensajen ba labarik sira mak ne’e informasaun aprende ba nune’e iha kunesimentu atu sai atleta profesionál tanba laos atu aprende deit joga ka tekniku nian maibe iha kunesimentu luan kona ba kondisaun saida mak atleta iha” sublinha mjdak
Iha fatin hanesan jogador juvenil Devanio da Costa Gomes hatete, nia parte sente kontente tebes tanba bele hetan informasaun kona ba anti-doping nian nunee bele prevene saúde liu Husi Konsumu anti doping.
“Ha’u kontente tanba ohin loron bele hetan informasaun kona ba anti-doping katak fo impaktu ba ita nia saúde bainhira ita konsumu bele hetan moras aten boot no rins tan ne’e ita tenki prevene labele utiliza anti-doping” dehan devanio
Enkuanto, iha serimonia sosializasaun nee hetan partisipante sira mai husi jogador juvenil nain Lima nulu (50) Mai husi sentru futebol juvenil Timor-Leste hamutuk ho treinador sira.
Reportajem: Abrão da Costa
