Díli, 14/03/2024 (LABEH)- Prezidente Autoridade Munisípiu Ainaro Manuela Georgina B.C Corte Real hateten, Orsamentu ne’ebé aloka iha 2024 ne’e la konsege Akomoda buat barak iha Munisípiu Ainaro, maibé nia espera, ba Kestaun ne’ebé mak identifika bele kobre iha 2025.
Prezidente Autoridade Munisípiu Ainaro Lamenta, nia nu’udar prezidente Autoridade mai tuir abertura sorumutu konsellu konsultivu teritorial iha city8 manleuana tanba simu orientasaun hodi preparasaun planu 2025 nian, para hare hodi hadia Kestaun ne’ebé mak presiza atu hadia iha Munisípiu Ainaro.
“Ohin ami mai iha ne’e ami simu orientasaun ba preparasaun planu 2025 nian, tanba 2024 ne’e ami mai iha fulan Janeiru orsamentu aprovadu, ne’ebé ami hein de’it ezekuta, iha situasaun ida ne’ebé ita hare katak, orsamentu ida ne’ebé mak aloka iha 2024 la konsege Akomoda buat barak ne’ebé mak ita hanoin katak, presija halo iha Munisípiu, maibé ita espera katak, ho kestaun ne’ebé mak agora ita identifika bele kobre iha 2025, ba iha proposta orsamentu 2025 nian”. Dehan nia bá jornalista iha city8 manleuana, Kinta 14/03/2024
Nia dehan, setor ne’ebe presiza tau konsiderasaun, Liu-liu agrikultura, saúde, Edukasaun, no mós iha buat balu hanesan infrastrutura,tanba iha Munisípiu Ainaro nia kondisaun ne’e iha area urbana de’it mós seidauk hadia no iha edifisiu barak mak ita presiza harii, para depois ita nia servisu Atendimentu públiku sira ne’e ho di’ak, no iha buat barak mak ita presiza hare hodi tau iha konsiderasaun ba orsamnetu 2025 nian.
Aleinde ne’e prezidente autoridade Munisípiu Ainaro akresenta, estrada liga ba Postu administrativu Hatubuilicu mak kondisaun estrada ita presiza tau Atensaun, tanba ita hare katak, iha ne’ebá ne’e fatin turizmu ne’ebé potensia teb-tebes, ne’ebé karik bainhira ita la hadia estrada ne’e, entaun difikulta ba vizitante sira atu ba iha ne’ebá.
“Ha’u fiar katak, tinan oin ita la’ós hare de’it ba Asuntu sosiais, maibé ita mós hare hotu Asuntu ekonómiku, atu nune’e bainhira Asuntu Sosiais ita rezolve, no Asuntu ekonomiku mós ita bele dezenvolve”. Nia hakotu
Reportajen : Adão da Costa
